Kirkjan reynir að fara eftir lögum

Á NFS í kvöld kom fram að leggja á fyrir næsta Kirkjuþing tillögu til að breyta því hvernig prestar eru valdir, meðal annars til að tryggja að valið falli ekki undir jafnréttislög. Það gengur ekki að hægt sé að stefna Biskupi Íslands fyrir eitthvað sem hann ber geistlega ábyrgð, en telur sig ekki hafa veraldlega.

Sumir eru nefnlinlega jafnari fyrir lögunum en aðrir, og kirkjan hlýtur að tróna þar í efstu hæðum. Í fréttinni kemur fram að skipa eigi valnefnd sem fari yfir umsækjendur og velji þá þrjá hæfustu. Við mat á þeim hæfustu verið gætt "eins og kostur er ákvæða jafnréttislaga."

Ég ætla leggja það fyrir næsta heimilisþing að breyta samþykktum og mun það leiða til þess að ég muni gæta, eins og kostur er, ákvæða umferðarlaga. Ég hef nú þegar tryggt mér meirihluta atkvæða þingsins og reikna fastlega með að umferðarlögregla muni sýna þessu skilning næst þegar hún stöðvar mig fyrir of hraðan akstur.

 

Scooby Doo 3

Er einhverjum sem dettur í hug að þessi réttarhöld séu eitthvað annað en skrípaleikur? Það berast sjaldan fréttir af því hvað er í gangi í réttarhöldunum, en mun fleiri fréttir af dauðum lögmönnum og uppákomum Saddams.

Teiknimyndaútgáfan verður tilbúin fyrir lok næsta árs.

Saddam Hussein vikið úr réttarsalnum í annað sinn

Morgunblaðið komið í hús

Áður en Blaðið fór í morgundreifingu hefði þetta ekki talist til tíðinda, það er að Morgunblaðið sé komið í hús fyrir klukkan 9 að morgni. Nú eru tímarnir aðrir og æ oftar þarf ég að hafa þolinmæði eða hreinlega hringja eftir Mogganum. Blaðið virðist hins vegar ekki koma út á mánudögum, líkt og Morgunblaðið gerði eitt sinn, og dreifing Moggans því í lagi.

Það var ekki fyrr en í síðustu viku, sem líklega var könnunarvika, að Blaðið kom heim til mín í morgundreifingu. Á meðan Blaðinu var dreift með póstinum, nennti blaðberinn greinilega bara stundum að henda blaðinu inn en aldrei kom það á laugardögum. Síðan hætti pósturinn að dreifa Blaðinu og Blaðið hætti að sjást. Nú er bara að sjá hvort ég fæ blaðið bara í könnunarvikum, eða hvort Árvakur fari að taka sig á í dreifingunni. Eða hvort morgundreifing Blaðsins eyðileggi mikið fyrir Morgunblaðinu.

Marshallinn í framboð?

Það var svolítið undarleg fréttin hjá Sjónvarpinu í kvöld, þar sem tekið var viðtal við Róbert Marshall um lokun á NFS. Það er í sjálfu sér ekki undarlegt að talað skuli við manninn, en hann sagði svosem ekkert sem hann hefur ekki sagt áður og fátt það sem ekki kom fram í fréttum í gær.

Það sem nýtt var í fréttinni var að fréttamaður tjáði okkur áhorfendum að Róbert hafi verið orðaður við framboð fyrir Samfylkinguna, nokkuð sem Róbert vildi ekki tjá sig um. Það þýðir að hann er að íhuga málið alvarlega, ef ekki á leiðinni í framboð.

Flestir nýjir frambjóðendur vilja koma "buzzinu" af stað áður en tilkynnt er um framboð. Einn tilgangurinn er að láta það hljóma sem svo að meiri eftirspurn sé eftir frambjóðenda en framboð. En til að koma buzzinu af stað, og til að fá viðtal í fjölmiðlum, þarf eitthvað fréttnæmt að vera í gangi. Svo er hægt að hnýta "slúðrinu" aftan við. Þó það eigi kannski ekki heima þar. Þá er ekki verra að þekkja fjölmiðlamenn, eins og Róbert sannarlega gerir.

Þetta verður eflaust ekki eina fréttin nú á haustmánuðum sem fjallar um eitthvað semi-áhugavert, en fer svo að snúast um framboðsmál.

 

Er Blöndal Akureyringur?

Þorsteinn Pálsson mærir Halldór Blöndal í leiðara Fréttablaðsins í dag. Meðal þess sem hann segir er "Sérstaða hans og ef til vill styrkur sem þingmanns hefur trúlega framar öðrum þáttum átt rætur í næmum tengslum hans við fólkið fyrir norðan. "

Annað hvort er langt síðan Þorsteinn hefur talað við Akureyring, eða ég tala við skrítinn hóp norðanmanna. Held þó að hið fyrrnefnda sé réttara. Ein ástæða þess að Akureyringar hafa verið í herferð fyrir því að fá Akureyring á þing er útbreidd skoðun að langt sé síðan Halldór Blöndal hafi verið Akureyringur og hann hafi misst öll tengsl við norðanmenn.

 

Kakkalakkafaraldurshætta

Fyrirsögn Fréttablaðsins í dag er með þeim hætti hún verður að fá að vera fyrirsögnin mín. Nú býð ég bara eftir Vaðlaheiðarvegamannaverkfærageymsluskúr.

Það sem liggur mér samt á hjarta í dag eru leiðarar. Líkt og leiðarar Morgunblaðsins er þessi dálkur nafnlaus. Um nafnleysi hefur það verið sagt að það dragi úr vægi þess sem sagt er, því þú veist ekki hvort þú getir treyst þeim sem skrifar (nei, Styrmir skrifar ekki alla leiðarana sjálfur). Nú hef ég ekki haft jafn langan tíma til að afla mér sama trausts og Morgunblaðið hjá þeim fáu sem kunna að rekast á þetta blogg, en ég ætla að halda því fram að nafnleysið sé ekki alslæmt.

Ef við berum saman vikt leiðara Morgunblaðsins við leiðara hinna blaðanna tveggja, sem skrifaðir eru undir nafni, er augljóst að Mogginn hefur vinninginn.

Leiðarahöfunundar hafa annað hvort vikt eða ekki. Það hefur ekki bara með það að gera að Þorsteinn Pálsson var fyrrum formaður Sjálfstæðisflokksins að það er tekið eftir og tekið mark á hans leiðurum. Maðurinn kann að skrifa og hefur pólitískt minni og sjálfstæða hugsun. Því er hann ekki bara að fylgja einhverjum sveiflum og leiðararnir eru ekki bara innihaldslaust hjal. (Og jú ófáir leiðarar Moggans eru líka bara innihaldslaust hjal).

Áður en Þorsteinn hóf störf voru leiðarar Guðmundar Magnússonar þeir sem tekið var eftir og einhverjar hræður í bísness lásu Hafliða Helgason. Björgvin Guðmundsson hefur átt einn og einn leiðara sem vit er í og Auðunn Arnórsson átti örfáa góða spretti um utanríkismál, en sá síðastnefndi virðist vera hættur í leiðarahópnum.

Þeir leiðarahöfundar sem minna eða ekkert er tekið mark á eru Kári Jónasson, Steinunn Stefánsdóttir og Jón Kaldal. Tekur einhver mark á Jóni Kaldal? Hann sjálfur og mamma hans mega ekki svara þessari spurningu.

Þegar núverandi ritstjóri Blaðsins skrifaði leiðara fyrir Fréttablaðið fékk ég stundum kjánahroll við lestur. Þetta hefur ekkert breyst og því hef ég forðast að lesa leiðara Sigurjóns M. Egilssonar. Fréttastjórnarnir tveir, Gunnhildur Arna og Brynjólfur Þór, hafa fengið að spreyta sig á leiðaraskrifum en hvorugt hefur vikt eða skrifar á einhvern þann hátt að það skipti máli. Eftir að hafa reynt nokkrum sinnum að lesa leiðara Blaðsins ætla ég að mæla með því að í staðin fyrir að þykjast hafa eitthvað að segja og láta það skína í gegn að leiðararnir eru skrifaðir af nauðsyn en ekki áhuga ættu stjórnendur Blaðsins að velta því fyrir sér að leggja leiðarana niður í núverandi mynd. Í staðin væri hægt að koma upp stuttum leiðaradálk í anda Séð og Heyrt.

NFS syrgt

Jæja, þá er búið að tilkynna opinberlega að NFS verði lokað. Í tilefni af því mun hefjast blogg um fjölmiðla, innihald þeirra, útlit, dreifingu og ja, hvað annað sem mér dettur í hug.

Fréttir af NFS koma ekki mikið á óvart, sérstaklega þar sem hann Denni er búinn að vera mjög duglegur að blogga innanbúðarupplýsingum um stöðu mála. Líkt og þegar hann hélt úti frettir.com, virðist Denni eiga góða vini hjá fyrrum Norðurljósum sem láta hann vita hvað er í gangi og senda honum innanhúspóst.

Þrátt fyrir að Siggi Stormur eigi erfitt með að þola úrtölufólk, líkt og hann sagði á Bylgjunni í dag, verð ég að segja að ég hafði ekki mikla trú á NFS konseptinu. Sérstaklega eftir að það var ljóst að Fréttaveitan sem átti að veita fréttum til NFS, Fréttablaðsins og Vísis og spara þannig blaða/fréttamenn á öllum stöðum, virkaði aldrei í raun. Þá skildi ég aldrei af hverju morgun- og síðdegisdagskráin var alveg eins. Þeir voru mjög fáir þættirnir sem voru eitthvað annað en almennt hjal. Það var einna helst Kompás, sem einnig var sýndur (og verður væntanlega enn) í opinni dagskrá Stöðvar 2. 

Þrátt fyrir þetta mun ég sakna NFS úr fjölmiðlaflórunni. Það kom fyrir að gullmolar stóðu upp úr hjalinu og stöðin átti sína bestu spretti þegar hægt var að senda beint frá einhverjum merkisatburði, sem varð til þess að Rúv hóf að senda beint frá viðburðum sem hefði ekki gerst annars. Þá stóð NFS sig mjög vel í sveitarstjórnarkosningunum, sérstaklega í hringferð sinni um landið, en einnig í almenna hjalinu þar sem frambjóðendur og misvitrir sérfræðingar fengu að tjá sig um sveitarstjórnarmál.

Miðað við magn auglýsinga skil ég afhverju stöðin rak sig ekki, og þá þarf einnig að hafa í huga gríðarlegan stofnkostnað. En ef á að spara (og bæta gæði fréttanna) skil ég ekki af hverju Sigmundur Ernir heldur áfram sem fréttastjóri. Maðurinn á að halda sig við að lesa fréttir. Honum hentar best að vera karlkyns útgáfa af Eddu Andrésar.