Fimmtíu keeeell

Stundum heillast ég mjög af ríkisforsjá. Jafnvel mannanafnanefnd þegar hún hafnar nöfnum sem börn munu einugis þjást af. Ég ætla að mæla með annari nefnd; auglýsinganefnd. Slík nefnd gæti tekið fyrir og bannað bjánalegar auglýsingar eins og auglýsingu Ingvars Helgasonar sem nú heyrist allt of oft. Þar er verið að auglýsa eitthvað um 50 krónur, (50 keeelll), eða 250.000 krónur (50 bláir, 1000 krónu seðillinn er fjólublár, 5000 krónu seðillinn er blár). Ég hef ekki mikið fylgst með kúlulingóinu, en málskilningur minn er all svakalega rangur ef ein kúla er þúsund krónur.

Fyrir áhugafólk um gott mál í fjölmiðlum mæli ég eindregið með Mannamáli Sverris Páls. Hann mætti bara taka fyrir miklu fleiri dæmi

Þrátt fyrir ýmis gömul met í verkföllum

Hefðu íslenskir blaðamenn þor til að gera svona? Þó ekki væri nema tvo daga? Það eru nú engar smá auglýsingar í laugardags- og sunnudagsblöðunum.

Dagblaðalaus helgi framundan á Ítalíu

Manstu eftir mér?

Eins og kynnt var hér í gær, var Félagsmálaráðherra að kynna hugmyndir stýrihóps um framtíð Íbúðalánasjóðs. Hugmyndirnar töldust ekki það merkar að fréttin næði "helstinu" í fréttum Sjónvarps og lendir t.d. á síðu 12 í Fréttablaðinu. 

 Fyrir nokkru var ljóst að SBV yrði ekki með í hugmyndum stýrihópsins, því kemur það ekki á óvart að samtökin mótmæli núna og gagnrýni. Guðjón mun verða eins og spýtt hundskinn að reyna að sannfæra lýðinn um að þetta ríkisrekna bákn sé af hinu illa.

Á meðan reyna framsóknarmenn að sannfæra lýðinn um að bankarnir séu af hinu illa. Í því máli eru allir framsóknarmenn Kristinn H. Gunnarsson. Þegar er framsóknarmaskínan farin að reyna að túlka þróunina síðan í gær (sem hefur verið mjög lítil) á þann hátt að þetta sé sigur fyrir Framsóknarflokkinn og séstaklega Árna Magnússon. (Ok, það er fyrrum aðstoðarmaður Árna sem er að reyna að sannfæra lýðinn, en ef þú vinnur fyrir flokkinn ertu flokkurinn)

Ég hef ekki heyrt aðra stjórnmálamenn en Magnús Stefánsson ræða um tillögur stýrihópsins, en Sjálfstæðismenn bakka varla algjörlega og stuðla að  áframhaldandi uppbyggingu ríkisstyrkts banka? Ýmsir þingmenn Samfylkingar eru í vafa um upbbyggingu ÍLS, hvað segja þeir? Verður ryki varnarmálaumræðunnar leyft að setjast áður en umræðunni um Íbúðalánasjóð verður talin fullkláruð?

Miðað við þau ítök sem Framsóknarflokkurinn hefur í Íbúðalánasjóði verður því miður að segjast að flokkurinn er ekki marktækur þegar kemur að umræðunni. Bara það hvernig flokkurinn hefur raðað inn flokksgæðingum fær mig til að styðja hugmyndir um einkavæðingu ÍLS.

Hugmyndin um að Framsókn taki hlutlausa afstöðu til ÍLS er svona álíka fáránlegt eins og hugmyndin um að bóndi verði góður landbúnaðarráðherra, sem hugsar um landbúnað út frá stærra samhengi neytenda en ekki bara út frá þröngum hagsmunum bænda.

Versta viðskiptafrétt í heimi?

Hvernig er hægt að skrifa svona frétt af viðskiptum án þess að minnast á

• Hve stóran hlut Leifur Sveinsson átti í Árvakri.
• Hve stóran hlut Straumur-Burðarás, Útgáfufélagið Valtýr og Forsíða áttu í Árvakri fyrir kaup.
• Hve stóran hlut sömu félög áttu eftir kaup.
• Hve mikið er greitt fyrir þennan hlut.

Það er auðvitað mögulegt að síðasta atriðið hafi verið of erfitt að fá upplýsingar um, eða þá það að við um þessa frétt eins og sumar aðrar að þær endurspegla frekar vilja yfirstjórnar en blaðamanna sjálfra. Sérstaklega er það setningin: "Á þessum tímamótum flytur Morgunblaðið Leifi Sveinssyni þakkir fyrir náið og árangursríkt samstarf um margra áratuga skeið," sem gefur til kynna að ekki hafi öllum helstu stöðlum óháðrar blaðamennsku verið beitt í þessari frétt.

Leifur Sveinsson selur hlut sinn í Árvakri hf.

Við erum svo stolt

Ertu búin(n) að hlægja nóg í dag?  Ef ekki er greinilegt að þú hlustaðir ekki á fréttir útvarps í kvöld og hvernig hæstivirtur utanríkisráðherra rembdist við að bera fram hin erfiðu orð á engilsaxnesku "even further".

Það væri einungis Guðni sem gæti slegið þessari tilraun við.

Utanríkisráðherra fjallaði um aukin framlög til þróunarsamvinnu á allsherjarþingi SÞ

Skemmtilegar tímasetningar

Stundum eru það litlu atriðin sem skipta máli, atriði eins og tímasetningar.

Búið er að boða blaðamannafund klukkan 16:00 í dag til að kynna samkomulag í varnarviðræðum Bandaríkjanna og Íslands.

Forvitnilegt er að klukkutíma fyrr, eða klukkan 15:00 hefur Félagsmálaráðherra boðað til blaðamannafundar til að kynna lokaálit stýrihóps um framtíðarstefnumótun um hlutverk og aðkomu stjórnvalda að íbúðalánamarkaðnum.

Hvor blaðamannafundurinn fellur nú í skuggann af hinum?

Jón og séra Jón

Er þetta ekki staðfesting á því sem áður hefur verið haldið fram? Að Róbert Marshall sé á leið í framboð...

Æfing í hnútukasti

Ég hef lúmskt gaman af því að fylgjast með síðum framsóknarmannanna þriggja; Péturs, Denna og Binga, þátt fyrir að framsóknarmennska sé fyrir ofan minn skilning. Það er bara eitthvað sætt við það hvað þeir eru duglegir að linka hver á annan.

Af þessum þremur er síða Péturs skemmtilegust. Ég veit hann var um tíma fréttastjóri Fréttablaðsins, á þeim tíma sem Fréttablaðið virtist eiga mjög auðvelt með á ná á þáverandi forsætisráðherra. En hvað er hann að gera nú? Kominn aftur á flokksskrifstofuna?

Öðru hvoru er hann með laumulegar athugasemdir í garð Sjálfstæðisflokksins, þannig að ég fæ flash-back í kosningabaráttu Björns Inga fyrir borgarstjórnarkosningarnar. Þá reyndi hann hvað hann gat að fjarlægja sig frá Sjálfstæðisflokknum, með þeim afleiðingum sem öllum er fullkunnugt um.

Lekavandamál miðaldra manna

Síðasta fimmtudag kvartaði  Össur Skarphéðsinsson yfir leynd Geirs H. Haarde. Hann væri búinn að semja við Bandaríkjamenn um brotthvarf hersins og gera nýjan tvíhliðasamning um varnir landsins án þess að ræða við utanríkisnefnd þingsins.

Þegar Össur mætti svo í Kastljósið á föstudag, fékk hann að heyra þá skýringu frá stjórnmálaprófessornum Hannesi H. Gissurasyni (sem reyndar var þarna frekar mættur í hlutverki sagnfræðings) að Sjálfstæðismenn hefðu af því reynslu að stjórnarandstöðunni væri ekki treystandi. Hann tók það sérstaklega fram að Alþýðuflokknum hefði ekki verið treystandi í Viðreisnarstjórninni. Ekki hefði mátt hósta án þess að landslýður vissi af því. Og því væri ekki hægt að bera samninginn undir nefnd sem bundin er þagnarskyldu, þrátt fyrir að bera eigi öll meiriháttar utanríkismál undir nefndina.

Nú í hádeginu á að kynna samninginn við Bandaríkjamenn fyrir flokksformönnum stjórnarandstöðunnar og síðdegis verður hann loks kynntur fyrir utanríkisnefnd.

Frá því fyrir helgi hafa okkur hins vegar borist stanslausar fréttir, þar af fyrstu fréttirnar frá Víkurfréttum, um það helsta sem í þessum samning á að vera. Og ef Ingibjörg Sólrún, Steingrímur J. og Guðjón Arnar hafa verið að fylgjast með er væntanlega fátt sem kemur á óvart.

Hverjum á nú að kenna um lekann? Tókst Geir ekki að halda utan um þetta áður en hann kynnti samningin fyrir stjórnarandstöðunni, þannig að það væri að minnsta kosti hægt að kenna henni um?

En fyrir þá vinstri?

"Ísfirðingar greiða sama verð og höfuðborgarbúar fyrir hægri nettengingu" stendur á Vísi, að minnsta kosti enn sem komið er. Er vinstri nettenging kannski sérstaklega hönnuð fyrir örvhenta?